බටර් විස්කෝතු හුලං විස්කෝතු හදමු (Butter Biscuits Puff Biscuits Hadamu)

අපේ පුංචි කාලෙ එක්ක බැඳුනු මතකයක් අද අරන් එන්න හිතුවා . දැන් වගේ රසම රස බිස්කට් වර්ග නැති උනත්, ඒකාලෙ තේ එකේ පොඟවගෙන කාපු මේ බටර් විස්කෝතුවට අදටත් මං ආසයි 💕💕💕💕ඔයාලත් හදලා රස බලන්නකෝ 😊😊😊

✅ අවශ්‍ය ද්‍රව්‍ය :

පිටි කෝප්ප 2ක්
සීනි මේස හැඳි 2ක්
ලුනු තේ හැඳි 1/2ක්
වතුර කෝප්ප 1/2ක්
යීස්ට් තේ හැඳි 1 1/2ක්
මිල්ක් පව්ඩර් කෝප්ප 1/4ක්
බටර් මේස හැඳි 2 ක්
මාදුරු ස්වල්පයක්

✅ සාදා ගන්නා ආකාරය :

🌸 වතුර කෝප්ප 1/2 දමා මිල්ක් පව්ඩර් ටික දියකර ගන්න.
🌸 එයට සීනි ,ලුනු එකතු කර දිය කර ගන්න.
🌸 වෙනම බෝල් එකක් ගෙන පිටි, යීස්ට් හොඳින් මිශ්‍ර කරන්න.
🌸 දැන් ලුනු,සීනි දියකර ගත් කිරි ටික ටික දමමින් පිටි එක අනා ගන්න.
🌸 බටර් මේස හැඳි 2 එකතු කරමින් පිටි මෝලිය විනාඩි 15ක් පමන නීඩ් කරන්න.
🌸 තෙත රෙද්දකින් හෝ ඉටි කොලයකින් වසා පැයක් පිපෙන්න තබන්න.
🌸 පැයකට පසු මෙම ඩෝ එක පිටි අල්ලෙන් තෙරපා වායු ඉවත් කරන්න.
🌸 නැවත විනාඩි 5ක් පමන ඩෝ එක නීඩ් කර කොටස් 10කට කඩා ගන්න.
🌸 කඩා ගත් පිටි කොටස් අතින් රවුම් කර බේකින් පේපර් එකක් දැමූ තැටියක තෙල් ආලේප කර, අඟල් 2ක් පමණ දුරින් සිටින සේ තබා පිටි බෝල මතුපිටින් පොඩ්ඩක් අතින් තද කර කුඩා බනිස් හැඩයට හදා ගන්න.
🌸 නැවත තෙත රෙදි කඩින් වසා විනාඩි 20ක් තබන්න.
🌸 විනාඩි 20කට පසු 160c න් pre heat කල oven එකක විනාඩි 20ක් bake කරන්න.
🌸 බේක් කර ගත් කුඩා බනිස් අවන් එකෙන් ඉවතට ගෙන විනාඩි 5ක් තෙත රෙදි කැබැල්ලකින් වසා තබන්න.
🌸 දැන් මේ කුඩා බනිස් ටික නිවුනු පසු දෙකට කපා ගන්න.
🌸 දෙකට කපා ගත් බනිස් කැබලි කපපු පැත්ත උඩ අතට සිටිනසේ තැටියේ අතුරා ගන්න.
🌸 නැවත අවන් එක 140 c න් රත් කර විනාඩි 15 බැගින් දෙපැත්ත දමමින් බේක් කර ගන්න.

🏵️ එක් එක් අවන් වල උශ්ණත්වය වෙනස් නිසා ඔයාලා මේ විස්කෝතු ටික කලු කර ගන්නෙ නැතුව බේක් කර ගන්න.

ඔන්න දැන් ඉතිං තියන්නෙ රස බලන්න තමයි 💕💕😊😍😍සැකසුම : © නදීෂා ගමගේ ..

හෙළයේ රස මිහිර